الأيدي اللطيفة الخفية ،

المدرسة ، عبارة عن بناء مستأجر ، مو الشكل التقليدي للمدرسة. شكلها من جوا متل بيت ، بيت قديم بمسلسل . إذا بدي أوصفها بقول وندر لاند. مو مفهومة. غرفة المعلمات عبارة عن ثلاث غرف جوا غرفة وكل غرفة الها جو وشكل وناس. أنا لساني هوملس، مش كتير بصحلي اختار لانه حتى بفراغاتي بشتغل ، فالمهم طاولة وكرسي باي زاوية. مع اني دايما بفضل عند الشبابيك . الصفوف عبارة عن غرف بيت ، وكل غرفة غير عن التانية . في صف كتير صغير لدرجة انو حطيت أغراضي على درج برا الصف ، وضل جسمي يخبط بالادراج فروحت بإصابات. وفي صف كتير كبير متل مسرح . المعلمات عددهم كبير ، لدرجة كل يوم بشوف ناس جديدة . بريق شاي كبير لونه اصفر ، وصحن نعنع ، كتير نفسي اجرب منه بس ما بقدر لاني موسوسة نوعا ما . بس منظره بشهي فعلا ، وموجود بكل مدرسة . اليوم طلعت ونزل ادراج شي مليون مرة ، حاملة سماعة اكبر مني ، وشنتة فيها كتب ، وفلاشكاردز، فوضى حقيقية.
كتير بنسأل اسئلة ، أهمها كم عمرك، متزوجة، وين ساكنة .
انت مس ، رح ادرسينا ، شو بدرسي.
تعليقات، مألوفة ، لبستك حلوة ، شايفة حالها ، بحبك ،اشتقنالك،مس حضرت الدرس .
النظرات كثيرة جدا لدرجة الاختناق.
* مس اول ما شفتك ما حبيتك بعدين هلا كتير حبيتك.
* مس البنت الي جنبي حكت عنك مجنونة.
اليوم وانا بصور الصورة ، نزلت بنت صف خامس بتعيط ، جايتها panic attack، احتراما للمعلمات حولي ما كنت اول المبادرين بالمساعدة ، بس ما حدا اهتم ، خليها تروح تغسل وجها.
قمت من مكاني واخدت البنت ومسكت أيدها ، شو مالك؟
مس حاسة اني رح اموت ، في اشي هون بلوزي عم بخنقني ومو عارفة اتنفس ، مس رح اموت . تمشينا أنا وياها بالساحة ، تنفسنا ، ومسكنا ورق الشجر وحسناه، اطلعنا ع السما ، وسمعنا صوت المعلمات بشرحوا. وانا كمان بصير معي متلك ساعات ، هلا عدي للعشرة شوي شوي رح تروح ، شفتي ما صار اشي ، انت منيحة ما في اشي بخوف . احسن ؟ اه . أرجعنا لجوا بعد ما هديت ، أكلنا ملبس ، وضلينا ماسكين أدين بعض ، ما رضيت تفلتني .
مريت اكتر من مرة بنفس الموقف ، مع كبار وصغار ، كل مرة بكون أنا الحدا الي بقوم وبعبر هالاطفال. الجهل بقول انو هدول الأطفال بمثلوا او حركات او او . طيب الجسم بقدر يمثل وقت يرجف وما يكون قادر يتنفس ، وقت ما يكون قادر يوقف بكا!
لو أنا كنت بدالها وما حدا اجا مسك ايدي وحسسني بالأمان شو كان رح يصير فيه وقتها ، كيف كنت رح اهدى؟ وانا مو فاهمة شو السبب الي عم بصير معي هيك .
وقت اجا ابو الطالبة ، برر بسبب ، سبب من اسبوع ، وهلا للبنت أعطت ردة فعل ، هيك فجئة بلا سابق إنذار.
أنا حزينة جدا لكل الأطفال الي ما عم يلاقوا حدا يطمنهم او يحسسهم بالأمان .

الشنتة الزرقا من براندي المفضل ، لقيتها ع البسطة من يومين ، والمقلمة كمان.
دايما بوقع ضحية الصفوف الصعبة والي فيها مشاكل ، بس الترويض بالحب واللطف هو اكتر اشي شاطرة فيه .